Zondag 21 juli 2024
Twentesport

Keuzestress

Geplaatst op 18 juni 2024 door   ·   Geen reacties

Fietsen en waandeln doo’k geane. Ik heb ginnen hekel aan mooie auto’s, mear éch genieten van de umgeving doo’j pas op de fietse of lopend. Tegenswoordig mu’j der dan extra biej zeggen da’j fietst zoonder batterieje. A’j ’t hebt oawer waandeln of lopen hoof dat nog neet.

A’k minne meaning gewe oaver fietsen, dan bedoel ik fietsen-zoonder-batterieje. Doar zeent nen hoop batteriej-fietsers het volstrekt met oneens. Ik snappe det wal, mear loa’w wal gewoon earlijk blieven. Fietsen is ne sport. Het vrög ook ne bepoalde techniek. Wielrenners weet doar alns van. Fietsen mag allene mear op eagen krach. Zelfs de minste pepmiddeln zeent zo strafboar as wat. Theo de Rooy kan doar hele verhalen van vertellen. Mer ook alle aandere hulpmiddeln zeent totaal oet den boze. Hele kleane hulpmesientjes, onzichtboar in het frame monteerd, mangt gewoon neet. Fietsen doo’j als zuvere krachprestatie allene mear met oew eagne lichaam. Al dee aandere dinge ma’j röstig gebroeken, mear dan is ’t gewoon gin fietsen mear. Dus, monteer iej ne machtige batterieje oonder ’t zadel met ’n elektrohulpmotortje, dan hef dat niks mear met fietsen te maken. Ne batteriej-fietse is puur gemak. Vuur leu dee neet mear köant fietsen, écht ne oetkomst. Vuur leu dee geane boeten zeent ook. Vuur leu dee gin riebewies mear hebt ook. Heelmoals niks op tegen, mear het is gewoon gin fietsen. Ook al zeg iej doezend keer da’j op de eko-stand fietst – woer ‘k trouwens niks van geleuve – mear det maakt het nóg alverdan gin fietsen. En dan nog ne keer: doar is niks op teegn, mear het is gin fietsen.

Fietsen is oew lichaamskrach zo economisch meugelijk gebroeken, zo good meugelijk verdelen, gebroek maken van hellingen woe’j noar dealten goat en oew krachen spoaren a’j der wier teegn-op goat. Oezelf oet loaten oetkoaren woer det kan, want iej munn ook wier in de heugte. Skoarp oetkieken vlak vuur bochen um zo min meugelijk vaart te verlezen en onderin nen fietstunnel natuurlijk nooit ofremmen – of nog slimmer – ofstappen!? Puur krachverlees. En vuural ook: wat is de körtste weg van A noar B. Met ne batteriej nem iej de weg met de minste hobbels en geater. Noh jea, duudlijker kan’k neet wean.

Zoonder batterieje is het kopen van ne goo fietse extra belangriek. Dan he’j ne fietse neurig den ’t heel makkelijk jach. Dus ikke noar een fietsenmaker hen. Hee har genog fietsen, mear allemoal met ne batterieje. Mer ik wil ech fietsen, dus ik wil der ene zoonder batterieje. Doar har hee der mear 3 van. Hee zea ’n betje skaam-achtig: “Zoonder batterieje is nit völle vroage mear noar.” Toen wees hee de twee leenkse fietsen en zei: “Disse twee zeent al verkoch. Kiest mear oet…”

Gerrit Dannenberg

Delen is sportief

Reacties (0)




Archief