Oons Nederlands elftal, ik proat oawer ’t voetballen, hef vergangene zundag in Eanske eure zogeneumde oetzwaaiwedstrijd spölt. Zee goat tooken wekke gangs met ’t EK. Alle dree koppelwedstrieden spölt ze in oons eigen laand, in de Arena van Amsterdam.
Of ze doar deurhen goat kommen is ofwochten. Zo te heuren meent ze van wal en dat zol n’n gloepensmooien opstötter wean veur de wiedere roondes. Loaw hoppen dat wiej noch een stuk of wat oardige partiekes te zeen kriegt.
D’r valt noch meer oet te zwaaien. ’n Poar wekke heb ik disse schrieveriej op disse stea invult. Veur ’t kommende tiedsbestek koompt d’r wat aans te stoan waorvan ik hop dat alman d’r oardigheid an beleavt.
Daankensweerd veur de andacht dee de leazers hebt spandeert an miene proateriej. Ik wunske alman n’n onwies mooien zommer en zeker ok wiederop völ plezeer met ’t oale normaal. Dat wiej alns wier recht too recht an keunt doon net as eertieds.
Goodgoan.
(Hoalt oene moodersproake an, ’t is gloepens mooi en iej kunt d’r bekaant oaweral met terechte).
Martin Peters
