Vrijdag 21 juni 2024
Twentesport

In ‘n kiekerd

Geplaatst op 30 januari 2024 door   ·   Geen reacties

Ik wor kotsmisselijk van parallellen dee organisatiedeskundigen trekt tusken ’t bedrijfsleaven en de sport. Geane hebt ze ‘t oaver teamwoark of spelverdeling op ’t veeld. Heel vake wordt ‘r van alns an de höare biej-eslept. Wat wál opgeet is de vergelieking van de organisatie van ne voetbalclub én de manere woerop de maatschappij georganiseerd is. Loa’k dichte biej de dure blieven. Dé grote klacht biej Excelsior ’31 in Riessen is aaltied: te völle andacht vuur hoofdmacht en wat doar oonder zit vaalt vake boeten een kiekerd. Biej ne club van mear as 1000 leden is det ook heel oargerlijk. Al wat keump oonder het eerste elftal speult, koomp immers ook alle wekke met völle plezeer biej mekoar; zélfs het 36-ste woer de opa’s zich nog elke wekke wier effen joonk veult. Der zeent ‘r zelfs dee ’t op nen Zïndapp noar de trainingen komt. Het is heel gezoond det ’n gezoond clubbestuur ook oge hef vuur de oonderkaante van de club. En koomp al ’t gedoo van de leste tied roond ’n verkiezingsoetslag ook neet duur het feit det Den Haag gin oge mear hef vuur grote delen van oonze samenleaving. De beruchte hoge-wenkbrauwenvroage van Kaag “Wie zijn die mensen?” zeg genog.

Kortens zat ik de kapel van laandgood Weldam in Moarkel. Op verzeuk van de Twentse School voor Theologie – den besteet echt – spreuk doar een Dominicaner hoogleraar Erik Borgman oet Nijmegen over de verhoolding tusken theologie en politiek. Ziene dissertatie har ooit as titel: “Sporen van de bevrijdende God: Universitaire theologie in aansluiting op Latijns-Amerikaanse bevrijdingstheologie”. O’j doar kapot van zeent of neet, in elk geval hef hee een heelder oge vuur de woarkvloere. Hee köm tot de angename conclusie det de wearlnd neet zo maakboar is as Mark Rutte oons wal wil loaten geleuven. Neet alns kö’j terugbrengen tot één hapkloar vroagstukke um op te lössen met ene oplössing. Mear zo geet het rechtevoort wal in hoast’ alle proatprogramma’s. En allemoal zi-w deskundigen, vuural op één probleem en zo woarke wiej alle oawende alle weareldproblemen of in een klean uur en ’n aandern dag beginne wiej gewoon wier an een niej probleem. Gin woonder de’w mekoar knettergek maakt met al dee onopgelöste problemen. Want komme wiej der neet oet, dan schrieve wiej een beleidsplan. Mear wiej köant gewoon neet alns oplössen. Stoarker nog: de meeste dinge in het leaven goat heel good zoonder beleidsplan. A’j neet köant accepteren da’j neet oaveral ne oplössing vuur hebt, wo-j kierewiet. En biej al dizze intellectuele discussies blif ne hele grote groep leu boeten ‘n kiekerd. Het 36-ste elftal opa-recreanten wordt neet mear ezeen. Det kan lange good goan, tót ze op de joarvergadering het clubbestuur wegstemt. En dan he’j het veur in de heelde.

Borgman adviseerden de’w ’s good mutten kieken noar middelgrote gemeenten. “Die zitten over het algemeen heel dicht bij hun werkvloer en weten wat er speelt. Die moeten ook voortdurend werken aan hun contacten mét die werkvloer om draagvlak te houden.” Volgens Borgman krie’j juust dán de goo verhooldingen, umda’j met alle loagen van de samenleaving mutten dealen. Iej hebt ze in ’n kiekerd. Zol Almelo met 15 roadsfracties ook biej de middelgrote gemeenten heuren?

Gerrit Dannenberg

Delen is sportief

Reacties (0)




Archief