Vrijdag 12 juli 2024
Twentesport

Sportleazen

Geplaatst op 4 juni 2024 door   ·   Geen reacties

Dezelfde kaansen vuur iederene is miej as zönne van nen textiel-oarbeaider oet het harte greppen. Mear eerst eaven dit. Het zol heel good wean as iederene an sport zol doon. Iej hooft echt neet allemoal an topsport te doon. Mer begint eens met ’n auto te loaten stoan. In het ANWB-blad leus ik 10 tips um braandstof oet te spoaren. Een allerlesten tip was: loat een auto stoan. Kö-j verwochen van ‘n autoblad. Mear featelijk zo’j munn beginnen met zonnen tip. De benzine de’j neet verdoot, is de eerste verdienste én al fietsend blief iej ook nog in beweaging. Ook leu dee gin drol hebt met sport of beweagen.

Want zukke leu zeent ‘r te ballast. Iej köant oe zelfs heel drok maken ín ne sportclub en niks an sport doon. Deurwaarder Charles Rozendal en zinnen vrouwe Wilma op ’n Nijverdal zeent slim actief biej RKSV De Zweef. Rozendal schreef zelfs een book met mooie beleavenissen biej ziene Zweef, mear hee voetbalt zelf neet. Wilma en hee stoat achter ’t skap, regelt de vriejwilligers, maakt het clubblad en maakt de kleedkamers schone. Biej De Zweef hef dit echtpaar völle contacten. Ze hooldt van gezelligheaid mear neet van zelf sporten. Het book van Rozendal har ‘n titel “Ballen uit de broek”. Gelukkig steun der nen spring-koppenden voetballer op ’n umslag, aanders was Rozendal ’t hok in-egoan vuur potloodveanterieje.

Mer de meeste Zweef-spórters hebt het book van Rozendal vaste nooit eléázen. Völle sporters doot leaver an sporten as an beuker leazen. Rozendal is nooit in het eerste elftal van De Zweef ekömmen en dat veendt iederene logisch. Al dee neet-leazers van De Zweef komt nooit allemoal in ‘t HBO of op de Universiteit. Mear dát blik ineens vreselijk te wean. Vandoar al dee campagnes um leu an ’t leazen te kriegen. Mear wa’w ook doot: leazen is allene angenaam en nuttig vuur leu dee ’t geane least. Duurstuderen is ook heel nuttig en lukt allene mear a’j geane dinge weelt weten.

Moord en braand schreeuwen umdat ‘t mensdom gin book mear les helpt niks. Gef ook niks, want der zöalt aaltied leu blieven leazen, ook jongeren, mer ófdwingen is nutteloos. Heugstens ‘n betje stimuleern. Duurlearen zöalt ook aaltied leu blieven doon dee d’r oarigheaid an hebt. Ofdwingen is hatstekke verkeerd, want dat hooldt ginnen leerling vol. In het kader van gelieke-kaansen kö’j iederene wal noar de havo en ‘t atheneum loaten duurstromen, zo as ze teegnswoordig doot, mear as dee möage doarnoa totaal gefrustreerd oetskeait met dwang-learen, hebt ze gin vak eleard en hebt ze nog niks. Eeuwig jammer van dee jonge möage.

Ik har in december een cv-kettel kapot. Den was gaauw emaakt duur nen vakman. Doarumme heb ik nog aaltied groot respect vuur nen loodgeter, ook zoonder Grieks en Latien.

Gerrit Dannenberg

Delen is sportief

Reacties (0)




Archief