Zaterdag 15 juni 2024
Twentesport

Kats oet ‘t lood

Geplaatst op 14 februari 2023 door   ·   Geen reacties

“Als het Nederlands elftal verliest van de Duitsers; wát je dán voelt, dát is chauvinisme.” Zo lea oonzen leraar Nederlaands vroger chauvinisme oet. Mear as Hollaand ‘t verspeulden in de finale; ha’j dan het geveul da’j as hele Nederlaandse natie ten oonder warren egoan? Tuurlijk neet. Dan mis iej toch elk geveul vuur verhooldingen.

Biej Baustellen in Duutslaand stoat vake grote borden: “Wir bauen für Sie”. Deank iej dan echt dat ze vuur oe persoonlijk gangs zeent? Tuurlijk neet. A’j van zon bord een persoonlijk geveul kriengt lied iej froai an zelfoaverschatting.

De Canadezen, Engelsen en Amerikanen hebt in ’n Oorlog vuur oonze vriejheaid evöchten. Wee dörft dat tegen te sprekken? Ze hebt in West-Europa inderdaad evöchten, vear van ’t hoes en met gevoar vuur eagen leaven, net as de Russen trouwens in Oost-Europa. Mear doar heur iej toch neet zo vake van, warren dee dan juust ne bedreiging vuur oonze vriejheaid…? Leu, loa’w proberen alns wal in de goo verhooldingen te zeen.

Geeldt ook vuur ’t sprekken oaver de noa-oorlogse generatie en de babyboomers. Dan zegt ze: “Dee hebt Nederlaand der met keaihard woarken wier boaven-op hulpen.” Joa klopt! Keaihard ewoarkt. Vuur Nederlaand? Ach kom nou toch! Mien vaa was de zachtmeudigheaid zelve, mear hee is alle dage echt neet noar ’n Stoom efietst met ’t geveul: “Nou zal’k vandage toch eens nuks gangs goan vuur Hollaand.” Oonze oolders hebt zich drok emaakt um nen moojen ceant te verdenen, um een hoes te kopen en um ’n hypotheek zo gaauw meugelijk of te lössen. Niks verkeerds an. Mear loa’w nou neet zeggen dat oawerdag gewoon hard woarken chauvinisme is… Loa’w alns wal in de goo verhooldingen zeen.

Langs de snelweg stoat nog aaltied hele riegeln vlaggen op ’n kop. Ik kan miej de boeren good vuurstellen. Het is groot onrecht um ze de scheuld te geven van alle milieuproblemen. Dat he’w met ’n aln edoan. Mear “Wij werken voor uw voedsel!”…. doar begin ik van te schilfern. Boeren hebt nooit vuur mien voedsel woarkt, mear  vuur ‘t eagen inkommen. Net as mien va, den dachen daagns ook neet an de wederopbouw van Hollaand. Boeren woarkt heel gewoon vuur ne goo pries vuur de melk en de vleaisbign. Niks verkeerds an. Mear scheait oet met dee sprookjes-slogans. Ze trekt miene sympathie vuur de boeren kats oet ’t lood.

Gerrit Dannenberg

Delen is sportief

Reacties (0)




Archief