Zaterdag 22 juni 2024
Twentesport

Sunterkloas

Geplaatst op 5 december 2023 door   ·   Geen reacties

Vandage is ‘t Suntekloas. Oawer Suntekloas doot völle bäkke en roadsels de ronde. Wus iej bevuurbeeld det Suntekloas gin weagenbelasting betaalt vuur zin peard, mer det ‘t peard tóch op de weg mag drieten. Net as alle aandere pearde netuurlijk. Wal een betje gek oarns, want heunde mangt det neet, terwiel heundebezitters in Riessen wál hoondebelasting betaalt.
At leu een Suntekloasroadsel opgeewt, begint ze vake met met: “Iej weet nog wal ’s wat.” Onzin, want der wordt juust van oe verwocht de’j het antwoord neet weet, aanders geet den bak de mist in. “Slöp Sunterkloas met een board boawen of oonder de dekkens?” Elk antwoord is verkeerd, want ze weelt oe gewoon de vroage stellen: “Geleuw iej nog an Suntekloas?”

Ook he’w noare oetdrukkingen as: zo dreuge as Suntekloas zin gat. Tjea…a’j een poar honderd joar oold zeent, dan he’j skienboar een oetgedreungd gat. Mer een dreug gat is aaltied nog better as schimmel tusken de bene en det hef Suntekloas netuurlijk ook. Ook hele onscheuldige vesjes wordt geane onfesoenlijk emaakt: Sinterklaas is jarig, zet hem oh-hop de pot…en zo verdan. Min va har nen variant van “Zie ginds komt de Stoomboot” met de twee angepaste leste regels (hoe huppelt zijn paardje het dek op en neer / hoe waaien de wimpels al heen en al weer): Hoe huppelt zijn auto het dek op en neer / Hoe waaien de-he hempslipn al heen en al weer. Gin stoark dichtwoark, mear doar gong ’t ook neet umme. Suntekloas mut gewoon een betje meender biejzeunder worden emaakt duur nen bak.

Mear een meujsten Suntekloasbak den ik kenne koomp van Denne van Knuldert. Achter dit pseudoniem zit Saxiondocent journalistiek Harry Kiekenbosch. Hee zal der as D66’er wal neet zo greuts mear op wean, mear dissen bak is dudelijk duur um verteeld op Radio Oost. Het geet zo.

Suntekloas jach op 5 december van Wierden noar Riessen. Biej de Reggebrugge op ’t Vear zut’e nen kearl stoan den mistreustig in de Regge steet te kieken. Det kan op 5 december natuurlijk neet. Dus Suntekloas stopt, koomp van ’t peard of en vrög an den kearl wat um mangelt.

“Jea noh,” zeg den man, “ik heb nen gloepens nen hekel an vleegmesienen en de wichter wont in Australië en doar wol ik toch wal ne keer hen. Kö’j miej ginne brugge noar Australië doon, dan zin’k der oet.”

– Tjonge, zeg Suntekloas, det is toch ook wat. Ne brugge heelmoals noar Australië…? Wee’j neet wat aans?

Den kearl dech eaven noa en zeg: “Noh vruit, doot miej dan mear ne vrouwe den neet dramt.”

Woerop Suntekloas zeg: “Dee brugge noar Australië…wo’j doar ook lantearnpöale langs hen hebm?”

Gerrit Dannenberg

Delen is sportief

Reacties (0)




Archief