Zaterdag 22 juni 2024
Twentesport

Grötter denken

Geplaatst op 23 januari 2024 door   ·   Geen reacties

Wat geet et toch slecht met plat hè? Och och. Terwiel a’j allemoal met de oplössing in ’n tuk loopt. Zelfs ’n grötsten onbenul kan zikzelf filmen en op tachtigdoezend gratis mediakanalen zetten. Doot et tien wekken en zeet wovölle publiek a’j hebt. Leu zint kuddedeers. Wo vaker a’j wat heurt, wo normaler as et wördt.

Wo’j neet met ’n kop in beeld? Standaard inebakken op iederen klookfoon zit nen insprekkers-app. Antikken en kuiern. Tadaaa: podcast. Iej mut et zelf allene belangriek genog vinden. Kuiert oaver voetbal, seks, Max Verstappen. Iej weett wal, de standaard onbenullige dinge woer’j in et Hollands ook al niks zinnigs oaver heurt.

Kansen genog dus. Mer et grote platgros dut knarperige Facebookstuks maken oaver vroger. Wier subsidiepötte löagtrekken vuur een beuken wat gin hond kocht. Wier een meuiste-woordverkiezing. Wier een domlollig vrouwonvreandelik plaatje. Wier dee gemeudelike ons-kent-ons-oavende. “De jeugnd wil niks mear met Plat en binnenkort zal et allemoal wal gebuurd wean.” Goh, woer zol dat an liggen!

Of de kategorie Onkundige Zelfoaverskreeuwers: “Internet? Ik wete nog nauweliks wo’k nen computer an mut zetten, höhöhöhöh.” Heel stoer, kearl. Pronken met oew egene skande. De wearld loaten weten da’j al zo’n 30 joar oaver ’n doatum zint. Iej bevestigt een vuuroordeel oaver platsprekkers en dreagt bie an et slechte imago.

Met ne hölding van ‘AI? Niejmoodske flantuten!’ (helaas völs te wiedverbreid onder platsprekkers) kom iej der neet. Et is noe of nooit: metdoon en Plat as zelfstandige sproake good indexeerd kriegen (met de nysassiske skryvwyse ja, dat is de snelste wieze) of vuur aait vergetten worden.

Ieder stukken plat wat bie op et internet kump tusken et Engelse geweld is gin verspilde möaite, mer winst vuur de sproake. Een noodzakelik teken van leaven: hallo, wiej zint der ook nog! Mer duur verdan mer de lippe noar et Hollands of Engels te loaten hangen, hold iej den zikzelf verstoarkenden krink in stand: Duur nooit wat in et Plat online te skrieven, zeet de grote techbedrieve et nooit, herkent ze dat kleine betten wat der wál is neet, en zett ze et vort as loos gebrabbel. Doarduur KAN et een ander ook nooit vinden en der an wennen, en blif et handiger um et mer helemoal neet te doon.

Wo mear a’w der in et plat op zett met ‘n allen, et iederene verdan onder ’n neuze wrievt, in mails, appkes, op Instagram, YouTube, Threads, X, wo better as zeukmachines en kunstklookte et köant herkennen en et an een relevant publiek anbeden. En wo normaler et wördt. Mer dan mu’w der wal achteran. Mear as ooit.

Martin ter Denge

Delen is sportief

Reacties (0)




Archief