Zondag 21 april 2024
Twentesport

Halven

Geplaatst op 19 maart 2024 door   ·   Geen reacties

Tusken alle donderieje duur twee mooie berichten nöast mekoar bie onzen stoatsumroop. Natuurlik prachtig as de jonge fluiten van et oflössingsskaatsen kampioon weett te worden. Mer de meakens zint in de kracht van öar leaven en hebt een heel team achter zik wat öar noar de top drif. Natuurlik mu’j der dan zelf nog wal onwies an trekken, mer an de rest kan et neet liggen. Helemoal verkeerd natuurlik, mer in een skaatsland as dit verwocht iej dat eagenlik ook wal een betten.

Nog knapper vind ik et dan van Jeannine Liebrand oet Nijmegen. Hee was pas met 48 joar begunnen met hardlopen. Verleden wekkenende leup he et olde wearldrecord vuur ‘n halven marathon in de 70+-klasse an stront. Neet per ongelukke. Nee, et menske had zik wat in ’n kop ezat en gung der gewoon vuur. Helemoal allene, op koffie en robetensap en heel wat egenwiezigheid.

Nen halven marathon is 21,0975 kilometer. Liebrand benen dat in 1 uur, 37 minuten en 54 sekonden of. Volgens ChatGPT is dat zowat 13 kilometer an et uur in duursnede. Ik hebbe zelf nen zet hard elop (verslag doarvan steet hier mean ik nog bie op de webstea). Ik hebbe zelfs ooit de gekkigheid in ’n kop ehad um met te doon met nen halven. Mer met 13 kilometer an et uur zeaden mie de skennen van: “Wat ducht der oe zelf van?” Mie ducht, et menske hef wal vakantie verdeend.

Hee is een betten zo as Pete & Bas, de senior gangsterrappers oet de UK woer as ik et hier earder al oaver had. Dee doot de jonge hunde allemoal eaven vuur wo as et mut. Mooi is dat.

Miene generatie meant nog wal es dat et allemoal noe mut geburen, anders nooit. Mer a’j een betten volholdt is der noa de 40 nog een heel leaven vol te maken, met nieje doelen en strevens. Wa’j der van maakt zi’j zelf bie. Dat gef locht. Ooit kan et nog wal es wat met ons worden.

Martin ter Denge

Delen is sportief

Reacties (0)




Archief