Zaterdag 22 juni 2024
Twentesport

Tattoo

Geplaatst op 17 oktober 2023 door   ·   Geen reacties

Snap ik wal heur. Da’j der bieheuren wilt. Dat wi’w allemoal. En ook da’j gearne ezeen worden wilt. Niks mis met. En da’w in dit land zo’n besköarmd leaven leidet da’j zelf niks slims metmaakt (allens walbeskouwd en ofewöagen) en da’j der dus ene nemt um nog iets van een interessant verhaal te hebben. Dikke prima.

Ook helemoal good da’j, um oe te onderskeiden (want dat dut iederene en dan heur iej der bie en val iej neet op) precies ‘nzelfden nemt as al dee doezenden anderen dee’t zo uniek zint. Umdat der zovölle betekenis achter zit:

Ne klokke, want dat dut oe denken an den tied toen a’j… Of een portret van Tjeedun en Tjelaanoo, dee kleine noaberterroristen van oe, op iedere kute ene (woer’j inderdaad ook ruumte zat hebt). Nen mysterieuzen doatum in Romeinse ciefers, achter de elleboage ook nog es. Een dun zwart lienken um ’n enkel, net onder ’n sokkenrand, vuur as ze oe ooit nog es ’n voot mut ofzetten.

Dat soort ingriepende dinge in oew leaven zint ook gewoon lastig te ontholden, zo ingriepend as ze zint. Dee mu’j oargens noteren. Anders verget iej et wisse. En et ennigste wa’j altied bie oe hebt, woer’j van opan köant, is oew egene foekerige liefsperkament.

Ook heel good da’j der ne Engelse sprökke bie zett. Rammstein zung al da’w immers allemoal in Amerika wont. En oew Engels is ook zo geweldig good (kearl, wat kön iej toch Engels!) dat et oe letterlik stukken nöager an de hoed kump as wonnear iej et der in et Hollands of Plat op zollen zetten. Be Yourself klinkt ook völle deepzinniger as Bliewt Oezelf. Hef ne grote extra biezundere wearde. Doarmet loa’j good zeen wo geweldig internationaal iej zint. Wowsers!

Wat ik neet begriepe is woerumme o’j doar dan ginne makkelikere stea vuur kiezet. Woerumme zo vuurzichtig vuur et skolder, de rugge of ‘n achterham? Iej hoovt der oe toch neet vuur te skamen? Wo’j oe ook dreeit, et gat blif jums altied achter.

As et dan enkel vuur oezelf is en een ander der niks met te maken hef, woerumme doo’j em dan neet op ne stea woer’j der zelf ook nog wat an hebt? Vuur de plette, in spegelbeeld? Dan zee’j em ’s morgens metene a’j oet bedde komt.

Ikzelf hebbe nen duurzichtigen tattoo. Dat is nen helen specialen. Zit op ne stea dat ik em zelf alle dage kan bewonderen. Want ik zin ook heel uniek, heure der ook helemoal bie. Be Authentic, heb ik achter op et gat stoan.

Martin ter Denge

Delen is sportief

Reacties (0)




Archief