Donderdag 30 mei 2024
Twentesport

Uniform

Geplaatst op 12 april 2022 door   ·   Geen reacties

Der is nen hoogleraar sport an de Vrije Universiteit in Amsterdam: Marjan Olfers. Steun moandagmoarn in de kraante. Vrouwleu en sport veen ik ne hele mooie combinatie. Ma’j tegenwoordig neet mear hardop zeggen, mear ne vrouwe op ’n peard, ne wielrennersfietse of de skaatsen? Prachtig! Hélène Hendriks an ’t woord oawer voetbal? Machtig stoer. En nou zelfs ne vrouwe as hoogleraar sport en recht. Geweldig! Zo ene he’w gewoon keaihard neudig. Want rechtevoort ontstoat ‘r problemen dee ik had edacht. Wee zal der immers een probleem maken van het verplicht dreagen van een shirt en bokse in de kleuren van de voetbalclub? Het is in het veeld ook heel gemakkelijk um oew plooggenoten snel te oonderscheaiden van de tegenstaanders. Iederene kan zeen da’j biej mekoar heurt, ook biej mekoar wéélt heuren. En de möage dee voetbalt in hetzelfde clubuniform zeent kats geliek: allene de prestatie telt en van totaal onbelang is o’j Victor heet, sprekt met ne Gooise r, oew familie rieke of oarm is. Dezelfde clubkleare is good vuur de solidariteit, want de kleding is ginnen ofleaidenden factor. Biej nums!

Rector Albert Wijnsma van Academie Tien in Leidsche Rijn wol heel geane een eande maken an de verschillen tusken leerlingen. Dät zol ook de kaans-ongeliekte tegengoan. Het zol de saamhorigheaid ook nen oppepper geven; een uniform in de schoolkleuren zol doarbiej können helpen. Ik komme toevallig net terugge van een poar wekke Gambia in Afrika. Wiej hadden doar ne woarkvekaansie in het zekenhuuske van Essau. Det lig op de noord-oever van de Gambia-rivier. Een stroatoarm gedeelte van dät mooje streppelke laand woer Senegal umhen lig. Gambia is Engelstalig en de schooljeugd dreg doar een schooluniform. Per schole verschillend natuurlijk. De schooljeugd is op de stroate herkenboar as schooljeugd én ze zeent heel greuts op het schoolpak. Oarm, stroatoarm of nog öarmer, dät is neet an de schooljeugd te zeen. En doar veult ze zich good biej. Eenmoal in ’t hoes mut det uniform dreks oet um het netjes te hoolden en dán zee’j de verschillen tusken jongeleu. Mear wat Wijnsma oaver zich hen hef ekregen met zin plan vuur een schooluniform, kö’j oe neet vuurstellen: een verlate 1 aprilgrap; een directeur mag niet zeggen wat mijn kind aan moet; leerlingen in een harnas stoppen voor de groep; naïef denken; gevaarlijk om kinderen aan de buitenkant gelijk te maken…

Ik zir bliej dä’w professor Marjan Olfers hebt. Loat Olfers zich nou eens bugen oaver de vroage of ’t schadelijk is dä’j in de hoofdmacht van oew voetbalclub neet oew eagen kleare magnt dreagen.

Gerrit Dannenberg

Delen is sportief

Reacties (0)




Archief