Groot sportniejs, verleden vriedag ’n viefteenden september. ’n 17-jöarigen kunstskaatser Ilia Malinin sprung nen Quadrupelen Axel, nen veer-en-nen-halven dreei um ’n egenen as. As eersten in de geskiedenisse van et kunstskaatsen. Heur’j niks van in et boerse, zelfgeile Nederland, want op dat onderdeel presteret wiej froai weinig en doar kan et grote gros van de testosteronbommen sowieso niks met. Kearls in strakke päkkes, sierlikheid en eavenwicht op klassieke muziek, oeh gatagat.
Harsenloos kieken noar wo as volk in nen kring achter mekoar an in enen wedstried vuur een joar an benzine verknooit en dan noar vrouwleu skreeuwen van ‘daar moet een piemel in’, dat geet der met strieken. De NOS, den as normaal iederen poep en scheet oet Amerika kopieert, deed der nog met ginnen jota oaver.
Ik hebbe in dissen kolumn al es vaker oaver miene skaatskunsten (neet kunstskaatsen) eskreven: neet um oaver noar hoes te skrieven. Dus neet zo gek dat ik toch wal bewondering hebbe vuur Malinin. A’j et zaggen… Iej konnen et neet of knipogen, zegge wiej dan in Riessen. En dat is ook precies wat der zo knap an is. Ik hebbe überhaupt al möaite um op de skaatsen in de bene te blieven. Des te knapper dat den jongen der dan ook bie weet te springen, veer moal um ’n egen as te dreeien en dan achterears wier op een been te landen. Binnen ne sekonde.
Vuur de krante deed Malinin nog wal pochen. Nen Russischen Amerikaan, dan wee’j et wal. Et was em al vake zat in de trainingen elukked, zea hee. Zienen instagramnaam is zelfs @quadg0d. En de echte leefhebbers weett em wal te vinden, want hee hef doar al zo’n vieftigdoezend volgers. Mer — da’s de jeugnd hè — toch mut hee nog een betten an ziene timing woarken. Met at hee zien kunststukken oetvoren, besleut nog zonnen god oet Zwitserland der met oet te skeiden. Op ’n zelfden dag gung tennisheld Federer met pensioen. Tja, dan kö’j drillen op dat ies wa’j wilt met oew zeuventeenjöarige brallerigheid, mer allens met bälle geet vuur.
Toch vund ik at Malinin wal wat mear andacht har verdeend. Hef der lange zat vuur etraind ja. Zo zee’j mer: a’j mer fanatiek genog zint, dan kö’j wat bereiken. Al vroag ik mie mangs wal of wa’j der an hebt, mer dat zal wal wier heel Twents van mie wean.
Ik dreeie lever nen quadrupel in et glas.
Martin ter Denge
