Woensdag 21 februari 2024
Twentesport

Elektries fietsen

Geplaatst op 7 juni 2022 door   ·   Geen reacties

Hardlopen is ne denksport. Dät was ne stelling in de dissertatie van ZGT-reumatoloog Hetty Baan. Ik kan zonne dwarsverbeending wal volgen: a’j zoonder oorverdovende oordöppe een uur hen trimmen goat, komt ‘r oonder ’t hardlopen nen hoop originele ideeën in oe op. Dus nen moojen voondst da’j hardlopen dan ne denksport neumt.

Elektries fietsen líekt op fietsen, mear hef natuurlijk niks met fietsen te maken. Watvonne dwarsverbeending a’j der ook mear biej bedenkt. Ik weet wal da’j dät rechtevoort neet mear mangt zeggen, mear ik zir op batteriej-fietsgebied nen soort Johan Derksen. Ik blieve gewoon zeggen: elektries fietsen hef niks met fietsen te maken. Dät koomp ook duur al dee batteriej-rieders met heur gepoch oaver de extreme kilometers dee ze maakt. “Gistern nog op de fietse noar Zwolle wes en wier terugge. Een heeln dag efietst!” Joa, met ne batterieje! Mear dä’s ginnen heeln dag fietsen, dät is ‘n heeln dag zítten.

Fietsen met ne batterieje hef ook niks met sport te maken. Iej köant knetter-deure sportkleare antrekken, nen gestroomlienden fietshelm op ’n kop zetten, mear a’j op nen mountainbike met elektromotor goat zitten, is dät vuural een froai potsig gezichte. Veen ik ook van leu op zonnen Speed Pedelec dee ’t oe met 40 kilometer in ’t uur inhaalt. Is gewoon nen brommert, mear dan zoonder geluud en as groot noadeel da’j de trappers ook nog roond mutten treaden. Sportkleare an op zon deenk is weggegooid geeld, want iej komt echt neet in ’n zweet. Nen helm op is wál nuttig, mear dät mu’j op nen brommert ook.

Ik heb echt niks gin bezwoar tegen leu met ne elektriese fietse. Zelfs neet as z’oe met nen vaart vuurbiej fietst of biej rotondes de bochten vake te hard ingoat en dan oongelukken maakt. Wa’k wál verveelnd zol veenden is de’w temet allemóál nen fietshelm op mutten zetten. Ook de gewone fietsers zoonder batterieje.

Elektries fietsen is ook heel good vuur leu dee aanders nooit wier vuur boeten zollen kommen. Dreks doon! Elektries fietsen is ook heel good vuur de museums, want de batteriej-rieders met ne museumkaarte bezeukt vake museums. Mear doot neet net o’j an sport doot met oewne fietse-met-batterieje. Iej zeent gewoon vuur ’t gemák, iej hebt niks met sport en dät mág natuurlijk! Mear maakt gin onmeugelijke dwarsverbeendingen. Of ’t mut zonne dwarsverbeending wean as van oonzen schoonmaakster. Den verteeldn kortens dät’e heel bliej was met zienen niejen Koga. Ik vreuge: “Met ne batteriej?” Ze zea: “Nee! Den zit ‘r op!”

Gerrit Dannenberg

Delen is sportief

Reacties (0)




Archief