Op mienen spotify heb ik ne lieste met verenzestig uur an de deepste, zwöarste rootsreggae. Leu vroagnt mie wal es: “Wat vind iej der toch an, an den reggae? Alle nummers klinkt etzelfde.”
He’j korrekt. Mer wal heel lekker etzelfde. Mer good, ik zal proberen of ik der de juuste wöörde vuur bie mekoar kan gadderen.
Een woarm bad is et, a’j der in zitt. Ne depe wanne woer as oe et woarme water verdan met regelmoatige tuskentieden tegen de börste slöt. Ne wage met één skel rad, woer’j niks an doot umdat et toch wal behaaglik skommelt. Nen Ferrari? Wat mu’j doar dan met? Gelukkig neet, dit is de muzikale keukelkoare. Et geet, da’s et vuurnaamste. De reize is belangrieker as ’n ankomst ja. Wo heaniger wo mear a’j metmaakt onderweg. Ne massage vuur de oren. En de rest van et lief, a’j et mer hard genog zett.
Tegelieke gauw en loom is et. Et is vrieheid: wil iej et dubbeltempo lusteren? Dat kan. Lever gewoon loom? Ook good.
Et trekket en slept. Et bommelt en boltert. Et bungelt en zwengelt. ‘n Depen donkeren bas grommelt oe to dat oe de bokse floddert um et gat. Boaa bobobobo bop bop boaah! De trommende tonen porket oe verdan in beweaging en de hobbelige stiltes loat oe verdan verlangen dat et wieder geet. En dat dut et ook, en wier precies etzelfde! Wat ne opluchting. Onderwiel tikket de hihats as speldenprikken verdan in de toploage, dus iej weet dat et nog wal eaven doert. Et bubbelende örgelken pikket kleverig oewakoe oewakoe tusken de slage duur. Een feest van ritme, zonder te drok of jachterig te worden, zo as dat met andere stielen nog wal es wil. Reggae verveelt nooit.
De woarme akkoorden oaver de hele muzikale loage, zo subtiel tuskenduur ekneppen dat et nooit tevölle wördt. De heraldische hoorns! Allemoal in de bene! Pep! Pabadaba dap dap dap padaaa! En wier verdan met dat hearlike Hakke Tsjakke Pakke Tsjakke. Den snare wat Rrring badabing binggg oe rinkelend wier bie de les brech. Dee volle dreeklank koorkes dee zingt van neet-ofloatende leefde, verdreet, verlees, winst, helligheid, geluk, of mangs gewoon oaver nen simpelen soepmoaltied met oew moat Jerry Doghead. Den as ze doodeskötten hebt.
Oaver herkomst, oaver wierkommen, oaver vort goan. Oaver wierumme goan noar ‘n oorspronk. Reggae is echt. Neet halfbakken noa te maken vuur winstbejag, want dan klinkt et neet. Reggae is allens of niks. En noe he’k oe de helfte nog mer verteld.
Nee, doot mie mer Reggae. Reggae is leaven.
Martin ter Denge
