Zondag 14 april 2024
Twentesport

Oetlulla

Geplaatst op 27 februari 2024 door   ·   Geen reacties

Johan Cruijff kon alderbassend lullen. Ook mooi lullen. Der zeent wal mear sportleu dee’k geane heurden. Van Hanegem met det mooie accent. Gerrie Kneteman, kuijern als nen wielrenner. Hele mooie logica van de woarkvloere. Ik magge dat wal. In de politiek köant ze doar een vuurbeeld an nemmen. Mer bliekboar woarkt dat toch aanders, want jea….Van Agt was wal nen woordkunstenaar, mear wal froai geforceerd.  Mear keunstmatig as keunstig. Van Mierlo moch ik geane heuren formuleren. Lubbers har toospraken woer gin mens mangs een töw an vaste kon knuppen; net zo lange verdan reenfeln tot ’n tegenstaander ‘t opgef.

Mer een grötsten lullebuul is toch wal Grapperhaus. Per oongelukke heurden ik um kortens in zon proatprogramma. Hee worden als oold-minister an-ekondigd én as niejn hoogleraar Rechtsstaat, Samenleving en Rechtspraktijk an de Erasmus Universiteit in Rotterdam. Ziene oratie har as titel: “De rechtsstaat is geen overbodige luxe.” Toch neet te geleuwen da’j ne wetenschappelijke carrière begint met zukke logica oet België.

Hee kreeg de vroage wat’e van Poetin veun…. Jea….. doar mos’e toch wal eawen oawer noadeanken….heel laankzaam…begun’e te kuijern….um oet te kommen op: “Ja…..gezien de dingen die hij doet kun je wel zeggen dat Poetin een dictator is…..ja…..daar ga ik niet omheen draaien….” En vearder sleug de oargernis nog slimmer too. Ik kriege van dat laankzaam formulerende volk vreselijke jökkerieje. Oew gesprekspartners neet ankieken, mer vuur oe oetkieken noar de vingertöppe. Heel lange wochen, hééél heanig formuleern en dan dinge zegn dee’j heel seempel in enen tel köant köant doon: “Oneens!” “Juist!” “Jawel!” “Dat niet!” Mear nee…de tied vol lullen en dan eawen in de roondte kieken met nen blik van: “Hoe heb ik hem dat gezegd?”

Hee kreeg ook nog de vroage wat ‘r aan staatsrecht zo mooi was. Hee zea: “Ik ben als kind in een ketel met staatsrecht gevallen…..bla bla bla bla bla….” Mens nog an too. Hee keant ziene klassieken en citeert verestig uit oet Asterix en Obelix. Noh jea… in good gezeelschap, want nen gelearden schriever as Yuval Hariri löt zich inspireren duur Walt Disney-films.

Het lik der op dat de universiteiten het antal boetenlaandse studeanten weelt vermeendern. Gewoon college loaten lopen biej Grapperhaus.

Gerrit Dannenberg

Delen is sportief

Reacties (0)




Archief