Zaterdag 22 juni 2024
Twentesport

Sportcast

Geplaatst op 14 mei 2024 door   ·   Geen reacties

’n Podcast is heelmoals hot. A’j ne grote toekomst achter oe hebt, kö’j dinge in de tied met mekoar vergelieken. Den groten stroom podkäste dut miej zo mear deanken an de geheime zenders van vroger. Möage dee een poar ceant kapot te hown hadden, kochen zich deure zeanders en maakten dan ‘n eagen radioprogramma. Met völle Hollaandstalige muziek wat Hilversum 3 te achterlijk veun. Mooie geheime-zendernaams as de Zwarte Panter, de Mexicaan van Emmerschans, de Zender Moskou. “Luisteraars en amateurs, hier is de Zwarte Panter. Luid en duidelijk, stationair. Is er iemand die een luisterrapport kan afgeven?” En dan mo’j bellen de’j ze “luid en duidelijk” heurden. Op ’n achtergroond dreejden Henk Wijngaard met de vlam in pijp en den gong zachter zo gaauw ’t kearlke achter ’n microfoon kuijern. Vake gloepens lange dramverhaaln woer ging meanske “stationair” verleagen um was. Mer ze warren op de echte radio en det was bliekboar genog.

Ze zatn in de ether op zelfgekeuzen frequenties en woer ze netuurlijk niks vuur betaaldn. Doarumme gung de PTT met de pealwage duur de stroaten um ze achter de knöppe vot te halen. Apparatuur van doezenden geuldens worden ze kwiet en een half joar later begunnen ze gewoon wier vanniejsen. Het wes ne sport um oet haande van de plietsie en de PTT te bliewen.

De podcast-gekte van teegnswoordig is toch froai ’t zelfde as de geheime zenders van toen. Vuur nen podcast he’j seempele apparatuur neudig. Via ’t internet of Spotify kö’j volslagen legaal oetzeanden. Fealijk maak iej gewoon ‘n radioprogramma’s en a’j weelt kan het zelfs makkelijk an beeld wordn ekoppeld. Zo gaauw a’j nen hobby hebt, hup, dreks nen podcast van maken. Woerumme make viej fealijk ginnen podcast van Twentesport. Hoge tied. Han Pape kan mooi schrieven en mooi kuijern. Loat de columnisten de eagen verhaaltjes vuurleazen. Een jingletje der tuskenduur. Den Sportcast kan der zo wean. Woer woche viej nog op?

Kearlsvolk genog. Biej Twentesport ook allemoal kearls! En det is toch wal heel  opmoarkelijk. Het vaalt miej ineens op det ‘t verestig ook hoaste allemoal kearlsvolk dee podcasts maakt. Zollen kearls zichzelf dan toch lewer heuren kuijern as vrouwleu? Hoe zol det toch kommen? Loa’w doar ‘s nen podcast van maken.

Gerrit Dannenberg

 

Delen is sportief

Reacties (0)




Archief