Zondag 21 juli 2024
Twentesport

Eande-joarsliestjes

Geplaatst op 20 december 2022 door   ·   Geen reacties

Biej topsport geet ’t um de beste prestatie. Mear een top is smal. Aanders is ’t ook ginnen top. Feit is dät heel weanig leu een good geveul hebt van dee top-prestaties. Wal vólgt nen heeln hoop leu de topsport. Ook doar kö’j wille an hebben, mear vanof de baanke noar ’t WK-voetbal kieken is op zich ginne sportieve prestatie. Oe vergapen an liestjes van de beste topsporters van het joar 2022 is óók ginne sportieve prestatie. Al dee eindejoarliestjes met toppers zeent dan ook akelig relatief.

Völle méár nut hebt de sportieve prestaties van heel völle amateursporters. Dee haalt nooit een top, komt nooit op ne toplieste van 2022, mear joar in joar oet beleaft ze heel völle plezeer an het gangs wean met de sport. Ze zeent ‘r aaltied, dreejt bardiensten, maakt kleedkamers schone, vervoert jonge sporters, verkoopt lotten en hooldt dät een leaven lang vol. Dát is pas ne topprestatie. De wearde van joaroaverzichten met ’n besten, snelsten en ‘n stoarksten is dus slim betrekkelijk. Net as een mooisten acteur of ’n mooisten miss van het universum. Dee topliestjes goat trouwens heelmoals neet oaver geleaverde prestaties. Nen moojn kop is jums neet iets wa’j zelf presteerd hebt. Net zo min as een groot verstaand.

Wiej weet heel good dat het echte geluk neet zit in ’t mooiste, beste, snelste en knapste. Belangriek is o’j een angenaam means zeent. En juust döar kö’j zelf nen heeln hoop an doon. Kiekt um oe hen: iej zeet vake genog kearls dee gin schijn van kans hebt biej de Mister Universe-verkiezingen. Tóch zeent ze heel populair. Ze hebt iets wat eur antrekkelijk maakt. Moeilijk te umschrieven, mear völle vrouwleu hebt völle mear belang biej een mooi karakter as biej nen moojn kop. Doarumme heur iej leu heel vake zeggen: “Dee twee had ik nou nooit biej mekoar ezocht.”

Dizze dinge drieft oons as kearls wal eens tot wanhoop. Vuural in de bouwkeetn wordt doar vake heel oaverzichtelijk oaver discussieerd. Frederic van Dam, nen jongen metselaar, had een zetje terugge de relatie oet. Noa een eenzaam weekend was’e doar op moandagmoarn in de eerste schoft oaver an ’t filosoferen. “Zo’n mooie meid. En als je ziet met wat voor een softe knuppel ze nu is…” Mans Vruggink höw um op de schoolder en zea: “Kom-op Frederic, de mooiste vrouwleu hebt vake de domste kearls!” Woerop Jans van Rees zea: “Dan mur iej wal ne onméúnig mooie vrouwe hebm!”

Gerrit Dannenberg

 

Delen is sportief

Reacties (0)




Archief