Zondag 16 juni 2024
Twentesport

Maatschappijleer

Geplaatst op 14 maart 2023 door   ·   Geen reacties

Bewegingsleer, vrijetijdskunde en omgangskunde warren ooit vakken woe-j van dachen dät ze neet echt besteunden. Natuurlijk ha’j een idee wat ze met dee vakken bedoelden, mear a’j meanden da’j dizze dinge gewoon oaverdag konnen studeren, dán was iej too an ’n intakegesprek biej een psychiater.

Der warren trouwens aaltied al hele woonderlijke vakken um te studeren woer nen woonderlijken waas umhen höng. Nemt sociale geografie. Gewone studeanten aardrijkskunde wörden al een betje sneu bekekken. Mear socialegeografen warren heelmoals ’t toppeunt. Woerumme zo’j ook ’n achtergroond willen weten van ’t verbouwen van earpeln in Groningen? Dät is kort duur de bocht, mear zo oarns oawer deanken hef aaltied ne oorzaak. Vroger wörden der neet vuur niks zo fijn ekuijerd oaver dee massa’s studeanten dee rechten of sociologie gongen studeren. Vake umdät ze niks aanders wussen.

Met grote passen doo’j neet alleman recht. Mear het maakt de weareld wal oaverzichtelijk. Oarbeaidersvolk zat altied biej de PvdA, de grote zakenleu biej de VVD en de boeren biej het CDA. Leenks en rechts ha’j nog wat klean gedoo det extreem kon deanken umdät ze toch nooit metregeerden. De communisten zatten biej de CPN en de alternativo’s biej de Boerenpartij van Hendrik Koekoek.

Oonderwiel is der wal wat veraanderd. De oarbeaiders zatten eerst biej de SP van Jan Marijnissen en doarnoa gong een nóg een grötter gedeelte noar de PVV.

Wiej hebt momenteel electoraal geografen. Dee hebt oonderzocht da’j an de huze en de wonkamers köant zeen woer de leu op stemt: in keurige huze wont VVD’ers en leu met ne grote booknkaste in de kamer stemt Groen Links of D66 want dee weelt geane loaten zeen dät ze intellectueel zeent. Mer he’j doar nen electoraal geograaf vuur neudig…??

Wiej hooldt allemoal slim van oaverzicht in de maatschappij. Ambtenaren kenne wiej as leu met ’n röstig leaven. Schoolmeasters hebt altied vekaansie. Brandweerleu zeent eagenlijk pyromaan…

Nen gepromoveerden gynaecoloog dee miej kortens ziene maatschappij-indeling oet de deuker: oogartsen warren oaver ’t algemeen hele vreandelijke dokters, kno-artsen deankt allene mear an nen hoop geeld verdenen in korten tied, dus knipt ze an de opende band amandeln, keenderartsen warren schatjes, internisten vage figuren en orthopeden loompe boeren.  ‘Brengt de aard van het werk mee; dat gesjor en getrek aan heupen en benen.’

As ik electoraal geograaf was, zo’k zeggen: ‘At oe wat mankeert, probeert eerst ‘s nen veedokter.’

Gerrit Dannenberg

 

Delen is sportief

Reacties (0)




Archief