Zaterdag 15 juni 2024
Twentesport

Meanselijke moate

Geplaatst op 15 januari 2024 door   ·   Geen reacties

Vuur ’t eerste in mien leawen heb ik in ’t zeeknhoes eleagen en zin’k opereerd. Vergelekken met leu dee ’t echt wat mangelt moch ’t eagenlijk gin naam hebben. Ik stuitern met de gladdigheaid van de fietse en breuk het slöttelbeen, leenks. Det hebt ze in ’t ZGT in Almelo netjes wier an mekoar ezat met een plaatje en een poar schruufkes. Ne dagopname. Mear ik heb miej slim verwoonderd oaver al dee schieven in de communicatie tusken dokter(s), zorgpersoneel en patiëanten. Dat dit oawerdag allemoal good geet is op zich al ’n klean woonder. A’j biej de eerste hulp binnenkomt zet oe ne physician assistant in het systeem. Ze maakt nen foto. Den wordt duur nen assistent van nen assistent-arts bekekken. Den besprek een foto met ’n assistent-arts en den kuijert der wier oawer met ‘n trauma-chirurg. Dan krie’j een gesprek met ‘n trauma-chirurg den ’t oe wal opereern wil. Dan een gesprek met ne  verpleegster en met nen anesthesist. Op ’n dag van de operatie wo’j in een sloap ebracht duur nen áándern anesthesist en wo’j opereerd duur nen áándern trauma-chirurg. Det z’oe in plaatse van ’t slöttelbeen an mekoar maakt ginnen verstaandtaand der oettrekt is wier net zon weunderke. Ik wazze trouwens ne wekke te vroo vuur de eerste ofspraak met een traumachirurg, mear doar worden toch ne mouw an-epast. De meanselijke moate hef in ‘t ZGT Almelo nog alle ruumte boaven alle de digitale systemen. Wat een gelukke. Mag ook wal ’s ezeg worden.

Biej de gemeente Riessen-Hoolten doot ze precies aandersumme. Umda’k met de fietse oawer ’n kop gong en opereerd mos worden, deenden ik ne subsidie-anvroage nen dag te late in. Op vriejdag gong ’n computer op slot. Een desbetreffenden ambtenaar begun der pas de aandere wekke op moandagmoarn noa 8 uur an. Dus ik steure den ambtenaar nen mail en legge oet de’k in ’t zeeknhoes heb eleagen en de termijn nét nit heb ehaald. Zet eaven een computer wier lös en het is trechte. Zeker at ’t geet um ne gemeente as Riessen-Hoolten woer de meanselijke moate eagenlijk aaltied boavenan steet. Onverbiddelijk nee dus. Ook al is der ne hele geeldige readen, want oawer ’n kop goan met de fietse doo’j neet vuur de wille en ook neet oet slordigheaid, mer deadline is deadline. Ook al begeent ’n ambtenaar der roem twee dage later pas an, dan nóg zi-j keaihard te late.

Pieter Omtzigt hef gewoon geliek.

Gerrit Dannenberg

Delen is sportief

Reacties (0)




Archief