Vrijdag 21 juni 2024
Twentesport

Nöalzeekte

Geplaatst op 13 september 2022 door   ·   Geen reacties

Wiej nöalt mekoar rechtevoort de ofgroond in. In de sport deugnt niks. In Den Haag mossen ze ’t heel aans doon. Het wear is van slag, net as de leu. A’j alns serieus nemt wat vuurbiej-koomp op Twitter, Facebook en LinkedIn, begin iej automatisch te zeuken noar een töw en ’n siensappelkistje. Nooit an too-geven. De meeste elleande is betrekkelijk en ’t oongeluksgeveul wordt oe vuural an-ekuijerd.

Joa der is nen hoop verkeerd in de wearelnd. Mear nen hoop dinge wordt an ewoarkt. Nen hoop dinge kö’w ook wat an doon. Mear alns kan neet ineens op-elöst worden. En leu nöalt en klaagnt nou eenmoal gearne. Ik nöale zelf gearne oaver nutteloze vuurzieningen as ’n bladbloazer en de dierenambulance. Mear vuur ’t eavenwicht mu’k der dan fealijk biej zeggen: dee ambulance-vriejwilligers doot niks verkeerd as ze nen geteling ophaalt den teegn de roete is evlöagn.

Lange tied dachen wiej  dät allene de boeren klaagnt. Mear zo heanig doo’w allemoal met. Is ’t een woonder? As z’oe mear vake genog vertelt dät ‘t allemoal slecht geet, dan nem iej det zo oawer.

Mear der geet ook heel völle góód. Mear dät heure wiej völle meender. Het is zelfs zo dät heel wat dinge bétter goat as vuur joaren terugge. Wiej vleegt mekoar noar de strotte in Nederlaand oaver stikstofreductie en CO2. En a’w neet dreks wat an doot, loat z’oons geleuven dät noa 2030 de wearelnd vergeet. Oonderwiel is een visotter volop wier terugge, de beavers vret de beume kaal, de agressieve klemmerds krabt de hardlopers een kop kapot, in de Regge kö’j wier zwemmen en wiej strukelt oaver de ooievaars. En dan toch mear ropen dät ’t neet good geet met de natuur. Klopt, de korhoenders op ’n Hoolterboarg heb ’t er zoer met. Mer a’j ‘n vos neet ofscheet, oaverleaft ’t gin korhoenderskuukntje.

En ‘t geet good met beume en buske. Neet met de heaide. Mear vroger was dät natuurlijk allemoal bos. Dee beume he’w vot-ehöwn. Op de schroa groond wol allene heaide greujen. Nou wille wiej dee groond alverdan schroa hoolden, mear wiej hebt neet genog geeld um alns geregeld of te plaggen en neet genog leu um alle boarkenbeumkes oet dee grote stille heaide te trekken. En dan wordt ’t wier bos. Hoo verkeerd is dät? Bekiekt het eens van dee kaante. O’j het wilt of neet: van mooi bos knap iej dreks al ’n stuk van op.

Gerrit Dannenberg

 

 

 

 

Delen is sportief

Reacties (0)




Archief